3大进攻主力打柴 AC遇乌甸细均力敌

意甲周中快车连场大战， 2哥AC米兰主场迎战乌甸尼斯。AC上场勇挫劲旅罗马，但同时付出沉重代价，3大进攻主力伊巴谦莫域、查汉奴古及列比锡都受伤，锋力受损。乌甸近7场5次开2球或以下，当中4场冇失波，有一定防守力，宁愿博2.5球入球细。

AC近况麻麻，上场作客以2比1击败罗马前，已经4战不胜。不过佢哋赢得非常艰辛，中场大脑查汉奴古踢完上半场已经要退下火线，首席射手伊巴谦莫域下半场初段亦伤出，AC缺少呢位39岁瑞典神锋，入球能力势必大减。

屋漏偏逢连夜雨，上场为AC射入致胜1球嘅列比锡都打柴，加上新签前锋文迪苏杰仍然养伤，今场排阵真係考起教练皮奥利，或要靠21岁小将拉菲尔利亚奥撑起锋线，今场想搵到入波唔係咁易。

乌甸尼斯防守有水准

作客嘅乌甸尼斯目前位处中游，护级压力唔大，佢哋近7场联赛取得3胜3和1负，当中4场冇失波，包括打和榜首国米0比0，遇上攻力强劲嘅阿特兰大亦可以踢成1比1，足见防守甚有水准。加上双方近6次交锋有4次总入球係2球或以下，入球细值得捧场。

艾逊打起信心半和有基

今晚德国盃续演两场8强大战，头场由今届神奇球队艾逊越级挑战德乙基尔；艾逊对上3圈先后淘汰两支德甲球队及一支德乙球队，绝对唔係靠「符碌」；基尔踢法稳中求胜，近5场有4次开半场和，不妨再追。

禾堡当弗唔赦莱比锡

来自第4级别联赛嘅艾逊原来有过风光历史，佢哋喺1955年曾经赢过国内顶级联赛冠军，翌年出战首届欧冠盃，係史上首支代表德国出战欧冠盃嘅球队。艾逊今届喺德盃一鸣惊人，首圈喺中立场以1比0淘汰德甲比勒费尔德，次圈返主场以3比2击败德乙前列球队杜塞尔多夫，上圈16强主场对利华古逊更踢出超水准，法定时间打和0比0，踢到加时喺先失波下，竟以2比1反胜对手，今次再度主场出击，相信冇人再敢睇小佢哋。

德乙2哥基尔今届德盃亦相当神勇，第2圈凭互射12码淘汰衞冕嘅拜仁慕尼黑，总计联赛及盃赛，佢哋近5仗开出4次半场和，踢法相当稳阵，今场可再追半场和。

另一场8强由ＲＢ莱比锡主场斗禾夫斯堡，两军近况都好弗，莱比锡近7场赢6场，禾夫斯堡就近8场7胜1和，而且连续8场冇失波，刷新球会史上最长不失球纪录，今季联赛首循环交锋，两军踢成2比2不分胜负，禾夫斯堡受让捧得过。