般尼回勇上盘剪布
今晚英超下游对决，般尼主场迎战尾2嘅西布朗。般尼虽然伤兵唔少，但状态显着回勇，反观西布朗易帅后未见起色，而且客场演出奇差，般尼小让平半，上盘值捧。
般尼除咗箭头基斯活特续抖外，派达斯、贝治古蒙臣亦告受伤，而上仗后备落场嘅罗比巴迪，易边后又伤出。不过佢哋喺伤兵满营下仍然表现硬淨，近3仗联赛取得1胜2和，连抢5分，就算只排第15位，但同降班区已拉开8分差距，如果今仗赢埋，对护级帮助甚大，战意必坚。
西布朗作客脚软
另一边厢，西布朗季中邀得「护级专家」艾拿戴斯出山，不过未见起色，「大Sam」接手后嘅11场联赛，仅得1胜3和7负，抢得6分咁大把，与同期般尼抢得14分，相差甚远，亦反映两军状态高低，加上新兵辛迪加斯伤埋，令进攻再打折扣。翻查纪录，西布朗今季12场联赛作客，仅得1胜3和8负，单计近3仗联赛客场更係输晒，包括不敌包尾锡菲联，见到都唔开胃，捧番般尼上盘好过。
