拎1分够完成任务
今晚续演欧联第5轮分组赛，H组重头大战「红魔鬼」曼联主场恶斗巴黎圣日耳门（PSG）。曼联今场只需和波就可提早晋级16强，形势上「睇定嚟食」唔慌会急；PSG近7场欧联作客有5次开出半场和，踢法相对保守，波童建议捧半场和。
曼联头4轮分组赛3胜1负，包括首循环作客以2比1击败PSG，由于同分先计对赛成绩，现有3分优势嘅曼联今场只需打和PSG，亦肯定可以较佳对赛压过PSG出线，所以今场首要目标係唔好输波。
曼联今季欧联表现远比联赛进取，4场分组赛加埋入12球，不过除咗主场大胜RB莱比锡5比0之外，其馀3场都有失波，后防依然唔稳阵。曼联喺2018/19年球季嘅欧联16强首回合，曾经喺奥脱福淨吞PSG两蛋，以佢哋现时班后衞嘅平均速度，对住基利安麦巴比、尼马甚至迪马利亚呢啲高速球员，随时输反击都输死，为免重蹈覆辙，相信曼联球员初段唔会急于压前，加上佢哋今场阵容不整，门神迪基亚上场联赛伤出，或由甸恩轩达臣担正，至于近2场踢正选、表现获好评嘅中场云迪碧克同安东尼马迪尔亦有伤，要抢先机唔容易。
PSG欧联作客特别小心
PSG现时与RB莱比锡同得6分，以较多对赛作客入球稍微佔先，由于RB莱比锡今轮只係对住榜尾巴沙克舒希，赢波机会较高，PSG失分就有可能跌至小组第3，失去出线主动权，所以唔容许佢哋放软手脚。不过PSG对上2场作客先后输畀RB莱比锡及摩纳哥，上周末联赛亦只能打和波尔多2比2，近况认真一般，作客要让波唔值博。自从德国教头杜曹喺2018/19年球季接掌帅印后，PSG作客出战欧联格外小心，喺佢领军之下，PSG近10场欧联作客只试过3次半场领先，其中近7场有5次开半场和，不妨追多次。
