阿积士下盘抵玩
作客红军有「黄金数据」护体
欧联D组大战，利物浦主场对阿积士。阿积士有「黄金数据」护体，17场欧联作客不败，面对伤兵满营嘅「红军」，要抢分绝对唔难。利物浦和波都肯定出线，亦唔需要急，免得再增添十字兵，阿积士受让笋到爆，下盘好路。
阿积士前季杀入欧联4强，相信大家仲记忆犹新，但原来佢哋仲有个好劲嘅数据，就係近17场欧联作客8胜9和未输过，对上一次作客输波已经係2016年8月作客负罗斯托夫1比4，之后阿积士就缔造4年几嘅欧联作客不败佳绩。
呢支荷兰1哥状态大勇，刚喺荷甲作客大胜安曼5比0，各项赛事豪取6连胜。阿积士拥有多支炮台，拉辛拿查奥尔、杜辛泰迪治、拿耶特及艾基伦甘都有数胡本钱，面对残缺不堪嘅「红军」后防，绝对有能力争取士哥。
利物浦1分够数唔使急
阿积士现时落后榜首利物浦2分，今仗如果赢波，出线就相当乐观，今场肯定会搏。查实利物浦亦唔一定要赢，佢哋只要多1分就肯定出线，加上上场联赛再有占士米拿受伤，以佢哋水蛇春咁长嘅伤兵名单，领队高普或「以慢打快」，希望阵中球员减少受伤。
从「红军」上仗对白礼顿睇得出，高普明显减少逼抢，尽量要求球员保留体力，改用稳守突击战术，再靠「3叉戟」及近7场入8球嘅迪亚高祖达，喺前线用个人质素寻找机会，相信「红军」如果初段未能取到甜头，亦唔介意攞1分算数，所以阿积士今场受让，真係好抵玩。
