英格兰为细所逼
迎战冰岛只求小胜
饱受伤患困扰嘅英格兰，欧国联Ａ2组煞科战主场斗冰岛。「三狮兵团」同「维京人」係Ａ级联赛2支入波最少嘅球队之一，5战只入3球，英格兰无缘出线，但唔搏咩？战绩咁难睇惊得罪球迷；搏尽，又惊再整伤球员得罪球会，陷入进退两难局面，今场应该都会踢得小心，即使赢波都係小胜就算，宁捧2.5球入球细好过。
搏得太尽怕得罪球会
英格兰张伤兵名单水蛇春咁长，阿历山大阿诺特、祖高美斯、佐敦轩达臣、拉舒福特、史达宁、禾特普斯全部缺阵，芝维尔都大机会唔出得，列斯占士就停赛，领队修夫基最难之处唔係排阵，而係惊再有球员受伤，好难同各大球会交待。尤其英军由于对赛成绩不及丹麦，即使呢场赢波而丹麦输波，都唔可以超越对方升上第2，今次仲搏到尽的话，之后就好难向球会攞人。
不过，另一方面，英格兰由上届进身欧国联4强，到今届肯定第3，尤其啱啱作客吞比利时2蛋，战绩上好难同球迷交待，相信唔止修夫基，英格兰球员自己都想喺呢场全取3分，唔使咁样衰。
事实上，冰岛5战全败，牌面上英格兰要赢波一啲都唔难，但作战心态有机会左右大局，而且「三狮兵团」踢欧国联入球能力麻麻，今届只入过3球，同冰岛、波斯尼亚及瑞典，入球数字一样咁差，英军累积7场欧国联法定时间，有6场开2球或以下。今场英格兰应该可以赢波，但从投注角度，主Ｗ太热唔抵玩，宁捧2.5球入球细。
